कञ्चनपुर । फागुन २१ गते हुने प्रतिनिधिसभा सदस्य निर्वाचनलाई शान्तिपूर्ण र व्यवस्थित बनाउन कञ्चनपुरमा सुरक्षात्मक प्रबन्ध कडाइका साथ लागू गरिएको छ। निर्वाचनलाई लक्षित गर्दै ड्रोन सञ्चालन र मदिरा बिक्री–वितरणमा अस्थायी प्रतिबन्ध लगाइएको प्रशासनले जनाएको छ।
सहायक प्रमुख जिल्ला अधिकारी मोहनचन्द्र जोशीका अनुसार अनुमति लिएर सञ्चालनमा रहेका सबै ड्रोन फागुन १८ गतेदेखि निर्वाचन प्रक्रिया सम्पन्न नहुँदासम्म उडाउन पाइने छैन। कुनै व्यक्ति वा संस्थाले नियम उल्लङ्घन गरी ड्रोन प्रयोग गरेको पाइएमा प्रचलित कानुनअनुसार कारबाही गरिने स्पष्ट चेतावनी दिइएको छ। मतदानभन्दा तीन दिनअघि देखि मतगणना प्रक्रिया सकिनेसम्म ड्रोनको प्रयोग पूर्णरूपमा निषेध गरिएको प्रशासनले जनाएको छ।
त्यसैगरी, जिल्ला सुरक्षा समितिको निर्णयअनुसार निर्वाचन अवधिभर जिल्लाभर मदिरा बिक्री, वितरण तथा सेवनमा पनि पूर्ण प्रतिबन्ध लगाइएको छ। आदेश उल्लङ्घन गरेमा कानुनी कारबाही गरिने जनाइएको छ।
जिल्ला प्रशासन कार्यालय कञ्चनपुर ले शान्ति, सुरक्षा र सामाजिक सद्भाव कायम राख्ने उद्देश्यले उक्त निर्णय गरिएको उल्लेख गर्दै होटल व्यवसायी, राजनीतिक दल, नागरिक समाज तथा सर्वसाधारणलाई सहयोग गर्न आग्रह गरेको छ। प्रशासनले निर्वाचनलाई निष्पक्ष, मर्यादित र सुरक्षित वातावरणमा सम्पन्न गराउने प्रतिबद्धता दोहोर्याएको छ।