काठमाडौं। चिनले गोप्यरुपमा आणविक विस्फोटक परीक्षण गरेको र ठूलो परिमाणमा थप परीक्षणको तयारी गरिरहेको अमेरिकाले दाबी गरेको छ । अमेरिकाले यसलाई अन्तर्राष्ट्रिय परीक्षण प्रतिबन्धको उल्लङ्घन भनेको छ ।
जेनेभामा आयोजित निशस्त्रीकरणसम्बन्धी संयुक्त राष्ट्रसङ्घीय सम्मेलनमा अमेरिकी उपमन्त्री थोमस डिनान्नोले चीनले गोप्यरुपमा आणविक उपकरणको परीक्षण गरेको र सयौँ टनको परिमाणमा परीक्षण गर्ने तयारी गरेको जानकारीमा रहेको र यसको आफूले पुष्टि गर्न सक्ने बताउनुभएको समाचार संस्था एएफपीले जनाएको छ ।
अमेरिकी राष्ट्रपति डोनल्ड ट्रम्पले गएको वर्षको अन्त्यतिर पनि यस्तै आरोप लगाउनुभएको थियो । शीर्ष आणविक शक्ति देशहरु अमेरिका र रूसबीचको अन्तिम सन्धि ‘न्यू स्टार्ट’ को म्याद हालै सकिएपछि अमेरिकाले रुस र चीनसँग आणविक हतियारको नयाँ सीमा तोक्नका लागि रुस र चीनसँग त्रिपक्षीय वार्ताको आह्वान गर्ने नयाँ अमेरिकी योजना प्रस्तुत गरिरहेका बेला पछिल्लो टिप्पणी आएको हो ।
चीनले यसअघि नै निशस्त्रीकरण वार्तामा सामेल हुन अस्वीकार गरिसकेको छ ।