काठमाडौँ । गृहमन्त्री ओमप्रकाश अर्यालले विदेशमा रहेका नेपाली नागरिकले मतदान गर्न पाउने व्यवस्था सम्बन्धी कानुनको मस्यौदा तयार भइसकेको बताएका छन्।
बिहीबार संघीयता सबलीकरण तथा राष्ट्रिय सरोकार समितिमा भएको छलफलमा मन्त्री अर्यालले विदेशस्थित नेपालीहरूले मतदान गर्न सक्ने व्यवस्था गर्न कानुनको मस्यौदा गरि निर्वाचन आयोगमा पठाइसकेको जानकारी दिए।
उनका अनुसार आयोगबाट प्राप्त सुझाव समेटी मस्यौदा कानुन मन्त्रालयमा पठाइएको र त्यहाँबाट सुझाव आएपछि पुनः गृह मन्त्रालयले अन्तिम रूप दिने तयारी भइरहेको छ।
मन्त्री अर्यालले भने,“कानुनको मस्यौदा गरेर निर्वाचन आयोग पठायौँ, त्यहाँबाट आएको सुझाव समेटेर कानुन मन्त्रालयमा पठाएका छौँ। कानुन मन्त्रालयले आफ्ना सुझाव पनि समेटेर गृह मन्त्रालयमा पठाउँछ।”
उनले ‘आउट अफ कन्ट्री’ र ‘आउट अफ कन्स्टिच्युन्सी’ दुई खालका माग रहेको जनाउँदै दुवै सम्भावनालाई व्यवहारिक बनाउन गृह मन्त्रालय प्रयासरत रहेको बताए।
त्यस क्रममा उनले प्राविधिक पक्षमा विशेषज्ञहरूको सल्लाहअनुसार अघि बढ्नुपर्ने बताउँदै, उचित समयमा निष्कर्षमा पुग्ने विश्वास व्यक्त गरे।
सांसदहरूले उठाएका आन्दोलनमा घुसपैठ वा अन्य स्वार्थबारेका प्रश्नमा मन्त्री अर्यालले सो विषयमा निर्वाचन आयोगले नै जवाफ दिनुपर्ने बताए।